Nun ambiente cargado de solidariedade e determinación, realizouse con gran éxito en Cangas do Morrazo o acto “Cangas móvese pola ELA”. Esta xornada deportiva e solidaria, dedicada á loita contra a Esclerose Lateral Amiotrófica (ELA), reuniu a centos de persoas comprometidas en visibilizar e apoiar a quen se enfronta a esta enfermidade neurodexenerativa.
A xornada comezou con emotivas palabras de dona Pilar Guimeráns Gallego, vogal da Asociación Agaela e organizadora do evento, que lembrou ao seu irmán Tino, exemplo de loita e visibilidade da ELA en Cangas do Morrazo. A continuación, os participantes foron divididos en grupos segundo as modalidades deportivas nas que participarían.
A carreira e a andaina, que percorreron fermosas paisaxes da vila, estiveron cheos de emoción e compañeirismo. Os participantes, ao ritmo dos seus pasos e ao son de aplausos e ánimos, demostraron o seu compromiso coa causa e o seu apoio aos que viven con ELA.
A proba de natación, celebrada nun entorno acuático espectacular, foi un momento de superación e solidariedade. Os bañistas mergulláronse na auga con determinación, demostrando que non hai barreiras á hora de loitar por unha causa xusta. Sorprendente foi a participación dun grupo de nenos que, con ganas e esforzo, completaron a proba de natación.
Durante todo o día, houbo un ambiente de unión e apoio mutuo. Familias, amigos e voluntarios uníronse para facer deste evento unha experiencia inesquecible. O apoio e a solidariedade manifestáronse en cada xesto de ánimo, en cada mirada de comprensión e en cada aperta compartida.
“Cangas móvese pola ELA” foi un éxito rotundo grazas ao esforzo e participación de todos. Este evento conseguiu visibilizar a realidade da ELA e transmitir unha mensaxe de esperanza e apoio a quen se enfronta a ELA. A través da unión e do compromiso, demostramos que xuntos facemos máis.
Agradecemos a todos os participantes, voluntarios, patrocinadores e colaboradores por facer posible este marabilloso encontro solidario, no cal se recadaron un total de 3.242€.
Seguiremos traballando xuntos para contribuír a investigar e mellorar a calidade de vida das persoas con ELA.
