Hai iniciativas que nacen dunha idea sinxela e que, grazas á xenerosidade e ao compromiso de moitas persoas, acaban converténdose en algo moito máis grande. «PincELAdas pola ELA» é unha delas.
A exposición, que reúne obras de diferentes artistas, nace da iniciativa de María Moldes Menduiña, socia de AGAELA que convive coa ELA dende hai uns anos, que decidiu poñer a súa creatividade e a súa paixón pola pintura ao servizo dunha causa moi especial: recadar fondos para apoiar o labor de AGAELA.
María comezou a pintar os seus cadros coas súas propias mans e decidiu que estas obras podían ter unha finalidade máis alá da artística. Quixo convertelas nunha ferramenta para axudar a outras persoas afectadas pola ELA e ás súas familias.
Así naceu esta exposición, que representa moito máis que unha colección de obras.
Detrás de cada cadro hai tempo, ilusión, sensibilidade e moitas ganas de contribuír. Cada pincelada de María converteuse nunha mensaxe de solidariedade e nunha maneira de seguir dando visibilidade á realidade das persoas que conviven coa ELA.
Toda a recadación obtida coa venda das obras será destinada integramente a AGAELA, contribuíndo así a manter e reforzar os servizos de atención, acompañamento e apoio que a asociación ofrece ás persoas afectadas pola enfermidade e ás súas familias.
A iniciativa de María foi sumando novas colaboracións. Outras persoas quixeron achegar tamén a súa arte e doaron obras para ampliar a exposición e conseguir unha maior recadación para AGAELA.
Queremos agradecer de maneira moi especial a Antón Sobral, Esperanza Cidrás, Manuel Chapela, Carlos Prado, Josuha Xanbreo e Benito Estévez a súa xenerosidade e compromiso.
Grazas a todas estas achegas, «PincELAdas pola ELA» converteuse nun proxecto colectivo no que a arte se pon ao servizo da solidariedade.
A inauguración contou tamén coa presenza de representantes do Concello de Bueu, cuxa colaboración foi fundamental para facer posible esta iniciativa.
Dende AGAELA queremos agradecer especialmente ao alcalde, Félix Juncal, á concelleira de Benestar Social e Igualdade, Laura Ogando, ao concelleiro de Facenda, Xosé Leal, á concelleira de Modernización, Isabel Quintás, e á concelleira de Cultura, Carmen García, por acompañarnos neste momento tan especial.
O apoio das institucións é esencial para continuar dando visibilidade á ELA e para sensibilizar á sociedade sobre as necesidades das persoas afectadas e das súas familias.
Dende AGAELA queremos agradecer profundamente a María por ter dado o primeiro paso e a todas as persoas que decidiron sumarse ao seu proxecto.
Porque cando a arte, a solidariedade e o compromiso se unen, conseguimos que unha iniciativa individual se transforme nunha causa colectiva.
Grazas, María, por converter as túas pinceladas en esperanza.
E grazas a todas as persoas que nos axudades a seguir avanzando cara a un futuro no que ningunha persoa afectada pola ELA se sinta soa.
