En AGAELA seguimos apostando por crear espazos de encontro nos que as persoas con Esclerose Lateral Amiotrófica (ELA), as súas familias e as persoas da súa contorna poidan compartir experiencias, sentirse acompañadas e, sobre todo, desfrutar de momentos de convivencia.
Con este obxectivo puxemos en marcha os Cafés Terapéuticos AGAELA, unha iniciativa pensada para ofrecer un espazo próximo, acolledor e distendido no que conversar, escoitarse, intercambiar vivencias e fortalecer os vínculos entre as persoas que conviven coa ELA.
Dous encontros, unha mesma finalidade: compartir
Durante os meses de outubro e novembro celebramos dous encontros en Galicia, achegando esta iniciativa a diferentes zonas para facilitar a participación das familias.
22 de outubro | Cangas do Morrazo
O primeiro Café Terapéutico tivo lugar en Cangas do Morrazo, onde nos reunimos para compartir unha mañá diferente arredor dun almorzo. Nun ambiente próximo e agradable, as persoas asistentes tiveron a oportunidade de conversar, compartir experiencias e coñecer outras persoas que están a vivir realidades semellantes.
O encontro converteuse nunha oportunidade para crear novos vínculos, expresar inquedanzas e comprobar o valor de contar cunha rede de persoas que escoitan, comprenden e acompañan.

6 de novembro | A Coruña
A segunda xornada celebrouse na cidade da Coruña, dando continuidade a esta iniciativa e ofrecendo ás familias da zona un novo espazo para encontrarse.
Unha vez máis, o café e o almorzo foron a escusa perfecta para compartir conversas, experiencias e momentos de proximidade. Porque, ás veces, algo tan sinxelo como sentar arredor dunha mesa pode converterse nunha oportunidade moi valiosa para sentirse acompañado e formar parte dunha comunidade.

A importancia de crear espazos de convivencia cando convivimos coa ELA
A ELA é unha enfermidade que transforma profundamente a vida das persoas diagnosticadas e tamén a das súas familias. Ás dificultades físicas e aos cambios que implica a enfermidade súmanse, en moitas ocasións, situacións de illamento social, soidade e carga emocional.
Por iso, desde AGAELA consideramos fundamental impulsar actividades que vaian máis alá da atención directa e que permitan manter as relacións sociais, conservar as afeccións, compartir experiencias e seguir participando activamente na comunidade.
Os Cafés Terapéuticos buscan precisamente iso:
- Favorecer o benestar emocional das persoas con ELA e das súas familias.
- Reducir o illamento e promover as relacións sociais.
- Crear redes de apoio entre persoas que comparten vivencias e preocupacións.
- Ofrecer espazos de escoita, confianza e acompañamento.
- Dar voz ás familias e coñecer os seus intereses, necesidades e propostas para futuras actividades.
- Non se trata unicamente de compartir un café, senón de crear oportunidades para encontrarse, escoitarse, apoiarse e seguir compartindo vida.
Seguimos creando comunidade
Desde AGAELA queremos agradecer de corazón a todas as persoas que participaron nestes dous encontros, pola súa implicación, confianza e ganas de compartir.
Cada conversa, cada sorriso e cada experiencia compartida reforzan a importancia de seguir promovendo iniciativas que poñan as persoas no centro e contribúan a mellorar a súa calidade de vida.
Porque convivir coa ELA non debería significar renunciar aos encontros, ás relacións nin aos pequenos praceres da vida cotiá.
En AGAELA seguiremos creando espazos para compartir, acompañarnos e lembrar que xuntos podemos construír unha comunidade máis próxima, inclusiva e solidaria.
Esta iniciativa enmárcase no programa «AGAELA Convivencia: actividades culturais, deportivas e sociais para persoas con e sen ELA», financiado pola Consellería de Política Social e Igualdade da Xunta de Galicia con cargo á asignación tributaria do 0,7 % do IRPF.




























