A Lei ELA, crucial para as persoas afectadas ELA en España, será votada no Senado o vindeiro 23 de outubro. Esta votación foi posible grazas á aceptación do procedemento de urxencia, o que permitiu que a tramitación da lei avanzase de xeito excepcionalmente rápido. Neste paso decisivo, o Senado deu prioridade a esta lei tras as reiteradas solicitudes das asociacións e entidades vinculadas á ELA, encabezadas por ConELA, que traballou incansablemente para visibilizar a necesidade urxente da súa aprobación.
Aínda que a votación está programada inicialmente para as 9:00 da mañá, existe a posibilidade de que se modifique a hora, tal como aconteceu no Congreso, onde se axustou o horario en resposta a unha solicitude previa.
Este procedemento de urxencia reflicte a crecente sensibilización cara á necesidade inmediata de lexislar en favor das persoas afectadas pola ELA e as súas familias. A aprobación definitiva desta lei marcará un antes e un despois na atención e apoio ás persoas que padecen esta enfermidade neurodexenerativa, para a cal, a día de hoxe, non existe cura.
Desde Agaela, xunto con ConELA confiamos en que este ritmo acelerado na tramitación da lei sexa un paso firme cara á súa pronta aprobación definitiva no Senado, o que suporá un gran avance na calidade de vida das persoas afectadas pola ELA.
