AGAELA reforza os seus servizos grazas a tres subvencións da Consellería de Política Social e Igualdade.
AGAELA recibiu este ano tres subvencións da Consellería de Política Social e Igualdade destinadas á realización de programas de interese xeral para fins de carácter social, con cargo á asignación tributaria do 0,7 % do IRPF e do Imposto de Sociedades.
Estas axudas permitirán á asociación seguir impulsando recursos fundamentais para mellorar a calidade de vida das persoas con Esclerose Lateral Amiotrófica (ELA) e das súas familias en Galicia, dando resposta ás necesidades que xorden ao longo de todo o proceso da enfermidade.
AGAELA Convivencia: promovendo a inclusión e a participación social.
A través do Programa AGAELA Convivencia desenvolveranse actividades culturais, deportivas e sociais nas que participarán conxuntamente persoas con e sen ELA. O obxectivo é crear espazos de encontro, favorecer as relacións sociais, combater o illamento e promover a participación activa das persoas afectadas na vida comunitaria.
Ademais de contribuír ao benestar emocional das persoas participantes, este programa axuda a visibilizar a realidade da ELA e a construír unha sociedade máis inclusiva e sensibilizada coa enfermidade.
Banco de Produtos de Apoio: máis autonomía e mellor calidade de vida.
O Banco de Produtos de Apoio de AGAELA permite ofrecer un servizo de valoración, orientación, asesoramento e préstamo gratuíto de axudas técnicas adaptadas ás necesidades de cada persoa.
Estes recursos resultan fundamentais para facilitar as actividades da vida diaria, favorecer a autonomía persoal, aumentar a seguridade e mellorar a calidade de vida das persoas con ELA e das súas familias.
Programa de Respiro Familiar: apoio para quen coida.
A ELA é unha enfermidade que xera elevados niveis de dependencia, facendo que gran parte da atención recaia sobre familiares e persoas coidadoras. Esta dedicación continuada pode provocar unha importante sobrecarga física, emocional e social.
Co Programa de Respiro Familiar, AGAELA ofrece apoio profesional que permite ás persoas coidadoras dispoñer de tempo para descansar, atender as súas propias necesidades ou realizar xestións persoais, contribuíndo así a previr situacións de esgotamento e a mellorar o benestar de toda a unidade familiar.
Compromiso coas persoas con ELA e as súas familias.
Estas subvencións supoñen un importante impulso para continuar desenvolvendo servizos especializados e adaptados ás necesidades reais das persoas con ELA en Galicia.
Desde AGAELA queremos agradecer á Consellería de Política Social e Igualdade o seu apoio, que nos permitirá seguir traballando para que as persoas afectadas pola ELA e as súas familias conten cos recursos, acompañamento e atención que precisan para afrontar o día a día da enfermidade.
