A Deputación de Pontevedra, por medio da Convocatoria do programa de subvencións a entidades sen fins de lucro para actuacións no ámbito social na provincia de Pontevedra no ano 2024, permítenos proporcionar o servizo de: Información, apoio e asesoramento a persoas ELA, coidadoras e familiares, da provincia de Pontevedra.
O obxectivo deste programa é mellorar a calidade de vida das persoas con Esclerose Lateral Amiotrófica, ofrecendo un servizo de información, apoio e asesoramento ás persoas usuarias, aos seus coidadores e familiares.
Para iso, establecéronse os seguintes obxectivos específicos:
- Asesorar sobre as necesidades vinculadas ás diferentes fases da enfermidade e dar acceso aos recursos públicos/privados dispoñibles.
- Manter o mellor grao de autonomía persoal posible e diminuír a dependencia dunha terceira persoa.
- Diminuír a sobrecarga do coidador principal.
- Dar soporte e apoio aos familiares e coidadores no proceso de evolución da enfermidade.
- Garantir a continuidade e seguimento do programa cos adecuados criterios de calidade.
As tarefas a realizar enmarcadas no proxecto foron as seguintes:
- Valoración inicial de necesidades dos usuarios.
- Orientación sobre o proceso da ELA.
- Asesoramento sobre trámites sociais.
- Asesoramento sobre o uso e adquisición de produtos de apoio.
- Asesoramento sobre accesibilidade e adaptación do fogar.
- Orientación no uso de dispositivos de apoio para a comunicación.
- Asesoramento sobre hixiene postural e técnicas de conservación da enerxía na realización de mobilizacións e transferencias.
- Apoio psico-emocional e escoita activa para fomentar a descarga do coidador.
- Reavaliación e seguimento individualizado das necesidades.
A Deputación de Pontevedra concedeu á Asociación Agaela a cantidade de 4.753,18 € para financiar parte do programa de información, apoio e asesoramento a persoas afectadas de ELA de Pontevedra, cubrindo un total de 25 horas de dedicación ao servizo.
