Agaela agradece á artista Luz Casal o apoio a través do Festival da Luz
A asociación galega de esclerose lateral amiotrófica recibirá a recadación desta edición do evento que destinará ao seu proxecto vivELAdigna
A Asociación Galega de Esclerose Lateral Amiotrófica (Agaela) quere agradecer á artista Luz Casal o seu apoio ao anunciar que será a destinataria do recadado na venda de entradas na recente edición do Festival da Luz, que tivo lugar os días 23, 24 e 25 de agosto en Boimorto. A achega económica do festival destinarase ao proxecto vivELAdigna, que ten como obxectivo acadar un coidado persoal e especializado ás persoas afectadas pola enfermidade.
"Para nós é especialmente importante que sexamos as destinatarias do recadado no Festival da Luz, non só polo que supón para contribuír económicamente a un proxecto de especial interese, senón tamén polo que implica en termos de visibilización da enfermidade, con todo o que eso conleva", sinala Joaquina Martínez Pintos, afectada e presidenta de Agaela.
No marco do propio festival, e diante dun público que superou nesta edición as 27.000 persoas, a artista Luz Casal anunciou que Agaela será a destinataria do importe das entradas da décimosegunda edición, como un apoio solidario para unha enfermidade que, segundo dixo, "é dura para quen a padece pero tamén para os seus familiares e achegados". Como cada ano, o Festival da Luz escolle unha causa para destinar os seus ingresos co fin de "tender a man", segundo dixo a artista promotora do evento, a quen o necesita.
Que é vivELAdigna
A presidenta de Agaela, Joaquina Martínez, anunciou tamén que o recadado irá directamente a financiar o novo proxecto da entidade, vivELAdigna, unha iniciativa coa que Agaela quere ir un paso máis alá para mellorar as condicións de vida das persoas afectadas pola enfermidade.
Por medio de vivELAdigna, buscarase un achegamento directo á persoa con ELA e ao seu entorno, crear un servizo de persoal de apoio especializado, con seguimento por medio de equipos itinerantes que visiten as persoas afectadas, forxándose un servizo de atención preto de cada familia.
vivELAdigana inclúe tamén un programa de formación ás persoas de atención directa e tamén a profesionais titulados na atención de persoas dependentes no fogar.
"Para nós é un paso adiante importantísimo porque suporá a atención directa e personalizada, analizando caso a caso e intentando dar respostas da maneira máis eficaz ás necesidades derivadas desta dura patoloxía. Non cabe ningunha dúbida que un programa como este precisa recursos e todos son ben recibidos, tanto os públicos como as achegas privadas. O Festival da Luz non só nos fai beneficiarias dunha cantidade económica senón que contribúe a que se fale da ELA e de que a xente repare dunha enfermidade que precisa de atención e coidados", sinala Joaquina Martínez, presidenta de Agaela, que xa se dirixiu a Luz Casal en nome da entidade para dicirlle que xa a consideran unha colaboradora especialmente querida.
